Ўзбекистон божхоначилари томонидан божхона чегаралари орқали нақд хорижий валюталарнинг ноқонуний олиб ўтилишининг олдини олиш борасида мунтазам чора-тадбирлар олиб борилмоқда. Хусусан, «Тошкент-Аэро» ихтисослаштирилган божхона комплекси ходимлари томонидан шу турдаги бир нечта божхона қоидабузарликлари фош қилинди. Бу ҳақда Давлат божхона қўмитаси матбуот хизмати хабар бермоқда.
Божхоначилар сирдарёлик аёл Сеулга учиши олдидан унинг сумкасини текширганда, аёл 2500 АҚШ долларини беркитиб қўйгани аниқланди. Красноярсклик аёлнинг рюкзаки назорат-рентген аппаратида текширилганда, унга яширилган 2800 АҚШ доллари бир лаҳзада фош этилди.
Россия Федерациясига йўл олган чустлик эркак ён дафтарига яширган 3400 АҚШ долларини божхоначилар пайқаб қолди. Тошкент—Деҳли йўналиши бўйича ўз юртига отланган Сингх ҳамёнидаги 3900 АҚШ долларини божхона баённомасида қайд этмагани ошкор бўлди.
Мавританиялик Ясин Тошкент—Дубай парвозига бироз кечикди. Бунга эса божхона назоратидан яширин равишда олиб ўтишни кўзлаб, чўнтагига беркитган салкам 4 минг АҚШ доллари сабабчи бўлди!
Ҳозирда юқоридаги ҳолатлар юзасидан божхона текширувлари ва суриштирув жараёнлари давом эттирилмоқда.
Рақамларга кўра, жорий йилнинг ўтган саккиз ойи давомида «Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 220 дан ортиқ божхона қоидабузарликлари натижасида 297 минг АҚШ доллари, салкам 26 минг евро, 2,2 миллиондан ортиқ Россия рубли ва бошқа нақд хорижий валюталарнинг ноқонуний равишда олиб ўтилишининг олди олинди.
Эслатиб ўтамиз, Ўзбекистоннинг чегара-божхона постлари ходимлари томонидан Ўзбекистон Республикаси божхона чегараси орқали чиқиб кетаётган шахслар валюта назоратидан ўтказилади. Амалдаги тартибларга мувофиқ, божхона чегарасини кесиб ўтаётган жисмоний шахслар томонидан тўлдириладиган йўловчи божхона декларациясида Ўзбекистон Республикасининг нақд миллий ва чет эл валютаси, бошқа валюта бойликлари ҳамда қимматбаҳо буюмларнинг мавжудлиги ва миқдори кўрсатилиши шарт.
Ўзбекистонда резидентларга 2000 АҚШ доллари эквивалентидаги нақд хорижий валюталарни йўловчи божхона декларациясида ёзма қайд этиш шарти билан эркин олиб чиқиб кетишларига рухсат этилади. Бундан ортиқ миқдордаги нақд валюталарни олиб чиқиш учун эса ваколатли банклар ёки Марказий банкнинг ўрнатилган тартибдаги рухсатномаси талаб этилади.
Норезидентларга эса Ўзбекистонга кириб келаётганда ўзи билан олиб келган ҳамда божхонага тақдим этилган йўловчи божхона декларациясида қайд этилган миқдордаги хорижий валютани олиб чиқишларига рухсат берилган.
Изоҳ (0)