O‘zbekiston bojxonachilari tomonidan bojxona chegaralari orqali naqd xorijiy valyutalarning noqonuniy olib o‘tilishining oldini olish borasida muntazam chora-tadbirlar olib borilmoqda. Xususan, “Toshkent-Aero” ixtisoslashtirilgan bojxona kompleksi xodimlari tomonidan shu turdagi bir nechta bojxona qoidabuzarliklari fosh qilindi. Bu haqda Davlat bojxona qo‘mitasi matbuot xizmati xabar bermoqda.
Bojxonachilar sirdaryolik ayol Seulga uchishi oldidan uning sumkasini tekshirganda, ayol 2500 AQSh dollarini berkitib qo‘ygani aniqlandi. Krasnoyarsklik ayolning ryukzaki nazorat-rentgen apparatida tekshirilganda, unga yashirilgan 2800 AQSh dollari bir lahzada fosh etildi.
Rossiya Federatsiyasiga yo‘l olgan chustlik erkak yon daftariga yashirgan 3400 AQSh dollarini bojxonachilar payqab qoldi. Toshkent—Dehli yo‘nalishi bo‘yicha o‘z yurtiga otlangan Singx hamyonidagi 3900 AQSh dollarini bojxona bayonnomasida qayd etmagani oshkor bo‘ldi.
Mavritaniyalik Yasin Toshkent—Dubay parvoziga biroz kechikdi. Bunga esa bojxona nazoratidan yashirin ravishda olib o‘tishni ko‘zlab, cho‘ntagiga berkitgan salkam 4 ming AQSh dollari sababchi bo‘ldi!
Hozirda yuqoridagi holatlar yuzasidan bojxona tekshiruvlari va surishtiruv jarayonlari davom ettirilmoqda.
Raqamlarga ko‘ra, joriy yilning o‘tgan sakkiz oyi davomida “Toshkent-Aero” ixtisoslashtirilgan bojxona kompleksi xodimlari tomonidan huquqni muhofaza qiluvchi boshqa idoralar vakillari bilan hamkorlikda aniqlangan 220 dan ortiq bojxona qoidabuzarliklari natijasida 297 ming AQSh dollari, salkam 26 ming yevro, 2,2 milliondan ortiq Rossiya rubli va boshqa naqd xorijiy valyutalarning noqonuniy ravishda olib o‘tilishining oldi olindi.
Eslatib o‘tamiz, O‘zbekistonning chegara-bojxona postlari xodimlari tomonidan O‘zbekiston Respublikasi bojxona chegarasi orqali chiqib ketayotgan shaxslar valyuta nazoratidan o‘tkaziladi. Amaldagi tartiblarga muvofiq, bojxona chegarasini kesib o‘tayotgan jismoniy shaxslar tomonidan to‘ldiriladigan yo‘lovchi bojxona deklaratsiyasida O‘zbekiston Respublikasining naqd milliy va chet el valyutasi, boshqa valyuta boyliklari hamda qimmatbaho buyumlarning mavjudligi va miqdori ko‘rsatilishi shart.
O‘zbekistonda rezidentlarga 2000 AQSh dollari ekvivalentidagi naqd xorijiy valyutalarni yo‘lovchi bojxona deklaratsiyasida yozma qayd etish sharti bilan erkin olib chiqib ketishlariga ruxsat etiladi. Bundan ortiq miqdordagi naqd valyutalarni olib chiqish uchun esa vakolatli banklar yoki Markaziy bankning o‘rnatilgan tartibdagi ruxsatnomasi talab etiladi.
Norezidentlarga esa O‘zbekistonga kirib kelayotganda o‘zi bilan olib kelgan hamda bojxonaga taqdim etilgan yo‘lovchi bojxona deklaratsiyasida qayd etilgan miqdordagi xorijiy valyutani olib chiqishlariga ruxsat berilgan.
Izoh (0)