Наманган шаҳрида «Ҳиндистон ярмаркаси» деб номланган савдо кўргазмаси бўлиб ўтди, дея хабар бермоқда ЎзА.
Ўзбекистон Савдо-саноат палатаси ҳамда Ҳиндистон ҳунармандлик буюмлари экспортини ривожлантириш кенгаши томонидан ташкил этилган кўргазмада ҳинд диёрининг тикувчилик, ёғоч ўймакорлиги, уй-рўзғор, заргарлик, эсдалик совғалари каби миллий ҳунармандлик буюмлари ишлаб чиқаришга ихтисослашган йигирмадан зиёд фирма ва компанияси маҳсулотлари намойиш этилди.
– Ўзбекистон ва Ҳиндистон халқларининг маданий, иқтисодий алоқалари мустаҳкам тарихий асосга эга, – дейди Ҳиндистоннинг HAD Product компанияси директори Сафи Аршад. – Халқларимиз тарихи, маданияти, адабиёти ва санъатида муштарак жиҳатлар кўп ва бу, айниқса, улкан шоир Заҳириддин Муҳаммад Бобур номи билан боғлиқ. Бинобарин, бир неча йилдан буён анъанавий тарзда ўтказиб келинаётган мазкур кўргазма савдо-иқтисодий алоқаларимизнинг янада мустаҳкамланишига хизмат қилмоқда.
Кўргазма давомида икки мамлакат тадбиркор ва ишбилармонлари ўртасида ўзаро тажриба алмашиш, савдо-сотиқ алоқаларини йўлга қўйиш борасида шартнома ва келишув битимлари имзоланди.
Изоҳ (0)