Ушбу ҳафтада Ўзбекистон Футбол Федерацияси Президенти ҳузуридаги мураббийлар кенгашининг навбатдаги мажлиси бўлиб ўтди. Унда миллий ва олимпия терма жамоаларининг ҳисоботи тингланди, деб хабар беради ЎФФ матбуот хизмати.
Мажлисга ЎФФ Президенти Мираброр Усмонов раислик қилди.
Олимпия терма жамоаси Осиё чемпионатига тайёргарликнинг асосий қисмини БААнинг Дубай шаҳрида ўтказади. Икки босқичли тайёргарликнинг биринчиси 2—14 декабрь кунларига тўғри келса, иккинчиси 17—28 декабрь кунлари бўлиб ўтади. 9 январда бошланадиган Осиё чемпионатига бориш олдидан ҳам олимпиячилар 2 январда Дубайга жўнаб кетиб, у ерда яна бир ҳафта мобайнида ташкил қилинадиган йиғинда мусобақага тайёргарлик кўради.
Виктор Жалилов бошчилигидаги олимпия терма жамоасининг олимпиада йўлланмасини қўлга киритиш йўлидаги тайёргарлик жараёни учун Ўзбекистон Футбол Федерацияси мураббийлар штабининг талаблари асосида мавжуд шарт-шароитларни муҳайё қилиб берган. Тайёргарликнинг режа асосида боришини бош мураббий назорат қилиб боради ва федерация раҳбариятига ҳисобот беради.
Мажлисда, шунингдек, миллий терма жамоа бош мураббийи Самвел Бабаянга олимпия терма жамоасининг тайёргарлиги борасида Виктор Жалилов билан елкама-елка ишлаш, зарурият туғилса ёрдам бериш вазифаси юкланди.
Кенгашда ўз ҳисоботини тақдим этар экан, Самвел Бабаян иродаси кучли, олдинга интиладиган, мардонавор кураша оладиган янги жамоа пайдо бўлаётганидан хурсанд эканлигини алоҳида урғулади.
Баҳрайн терма жамоасига қарши ўйинга тайёргарлик 1 октябрдан бошланади. 30 сентябрда чемпионат ўйинлари тугайди ва эртасига футболчилар миллий терма жамоа йиғинига киради. Тошкентда машғулот ўтказилади ва 6 октябрь куни чартер рейси билан Манамага учиб кетилади.
Изоҳ (0)