«Даракчи» нашри Ўзбекистон санъати жуфтликларининг ўзига хос рейтингини тузиб чиқди, деб ёзади «Кун». Ундан ўрин олган жуфтликларнинг асосий жиҳати шундаки, улар бир-бири билан саҳнада танишган.
Қуйида ушбу рейтингни келтириб ўтамиз:
1. Ўзбекистон халқ артисти Лутфулла Саъдуллаев ва Ўзбекистонда хизмат кўрсатган артист Гулчеҳра Саъдуллаева ҳақида сўз борганида, барчанинг кўз ўнгида Ўткир Ҳошимов асари асосида суратга олинган «Баҳор қайтмайди» видеофильмидаги Алимардон Тўраев ва Муқаддам келади.
«Бу ролни ижро этганимда 31 ёшда бўлиб, бир ўғил, бир қизнинг онаси эдим», — дейди актриса. Бу икки санъаткор театрдаги 46 йиллик фаолияти давомида жуда кўп бор партнёр бўлган.
2. Ўзбекистон халқ артисти Мирза Азизов рафиқаси Тожибар Азизова билан институда бирга ўқиган. «Бир-биримизни рашк қилмаганмиз, дея олмайман. Лекин ишонч туфайли рашкка барҳам берилган. Рафиқам билан қийинчиликларни бирга енгиб ўта олдик», — дейди актёр.
3. Ўзбекистонда хизмат кўрсатган артист Александр Бекчанов ва Ўзбекистон халқ артисти Меҳри Бекчанова 1980 йил ҳозирги Ўзбекистон давлат санъат ва маданият институтида ўқиб юрган кезлари танишган.
«Меҳрихонни бир кўришда севиб қолганман», — дейди Александр Бекчанов. Бу жуфтлик 1985 йили оила қурган. Улар икки фарзандга ва бир набирага бошчилик қилиб келмоқда.
4. Севинч Мўминова ва Шароф Муқимовларнинг оила қуриши эса шоу-бизнес вакиллари учун ҳам, мухлислар учун ҳам кутилмаган воқеа бўлган.
«Турмуш ўртоғим, аввало, юраги тоза инсон. Шунингдек, оиласи ҳам жуда намунали оилалардан. Санъаткорни фақат санъаткоргина тушуниши ва ҳис қилиши мумкин. Тўйдан олдин бир-биримизни яқиндан ўрганганмиз, ўртамизда соф ва беғубор туйғулар бор», — дейди Севинч.
5. Шоҳида ва Маҳмуд Исмоиловлар ҳам институтда бирга таълим олган. Улар аввалги Ёшлар, ҳозирги Ўзбек Драма театрида яқиндан танишган. Бир неча спекталларда биргаликда рол ижро этган. Иш баҳона муносабатлари мустаҳкамланиб борган.
Маҳмуд Исмоилов дилидагини изҳор қилиши учун икки йил вақт кетган экан. Тўғридан-тўғри севги изҳор қилмай, «Онамни уйингизга совчиликка юборсам майлими?», — деган экан. Шу тариқа 1980 йилнинг 4 августида оила қурган.
6. Ўзбекистонда хизмат кўрсатган артист Карим Мирҳодиев ва актриса Сайёра Мирҳодиева театр сабаб танишиб, севишиб оила қурган. Йигирма олти йилдан буён бахтли ҳаёт кечириб келмоқда.
7. Таниқли санъаткорлар Жумадулла ва Саида Раметовлар талабалар тураржойида танишган. Сўнг улар дўстликдан севгигача бўлган йўлни босиб ўтган. 1981 йилнинг 23—24 октябрь кунлари улар оила қурган.
8. Хонандалар Дилсўз ва Фаррух Раимов илк бор Навоийда ўтган мусиқа танловида учрашган. Бироқ Дилсўз Фаррухнинг севгисига шубҳа билан қараган. Йиллар ўтиб, коллежга ўқишга киргач, салом-аликдан бошланган муносабат, дўстлик ришталари билан, сўнг муҳаббат билан мустаҳкамланиб, улар шу йили оила қурди.
9. Севара Солиева ва Маъмур Султоновлар курсдош бўлиб, илк бор Ўзбекистон Давлат санъат ва маданият институтига имтиҳон топшириш куни кўришган. Улар 2013 йилнинг 23-октябрида оила қурди.
Изоҳ (0)