Apple компанияси Mac компьютерлари учун OS X El Capitan операцион тизимини 30 сентябрда ишга туширади. Бу ҳақда компания вакиллари маълум қилган.
El Capitan платформасида янгиланишлар 2014 йилги Yosemite’даги каби кўп эмас. Мутахассислар асосан икки жиҳат: мобил iOS’га яқинлашувчи тизимда ишлаш тажрибаси ва унумдорликка эътибор қаратди.
El Capitan’даги асосий янгиликлар қаторида ўйинлар ва дастурларда равон графикани таъминлаб берувчи Metal сурилгичи, экранда икки дастур билан бир пайтнинг ўзида ишлаш имконияти ҳамда San Francisco номли янги шрифтни санаб ўтиш мумкин.
Тизимнинг доимий дастурлари ҳам янгиланди. Safari браузерида Pinned Sites функцияси кўп кириладиган сайтларни жамлайди, Mute номли янги тугма эса исталган саҳифадан келувчи овозни ўчиради. El Capitan янги iPhone 6s ва 6s Plus телефонларида суратга олиш мумкин бўлган фотосуратлар ва овозли қисқа видеороликлар жамланмаси — Live Photos’ни компьютерда кўришга ҳам имкон беради.
Янги операцион тизимни бепул юклаб олиш мумкин.
Изоҳ (0)