Тошкентда Microsoft Lumia 640 XL 1,8 миллион сўмдан сотувга чиқди

Ўзбекистонда Microsoft компаниясининг сўнгги янгиликларидан бири — Lumia 640 XL модели савдолари бошланди. «Mobinfo.uz» хабарига кўра, қурилма Windows 8.1 операцион тизими остида ишлайди.

Қурилма ажрата олиши 720 пиксел бўлган 5,7 дюймли экран, Snapdragon 400 процессори, 1 гигабайт оператив хотира, 13 мегапикселли асосий ва 5 мегапикселли селфи-камера билан таъминланган. Қалинлиги атиги 9 миллиметр эканлигига қарамай, 3000 ма/с қувватли аккумлятор ўрнатилган, бундан ташқари, Ўзбекистонда сотилаётган версияси LTE технологиясини қўллаб-қувватлайди.

Бонус сифатида Microsoft харидорларга Office 365 Personal офис дастурлари тўпламини бир йиллик бепул обунаси билан тақдим этади (тўплам обунасининг бир йиллик баҳоси 69,99 долларга тенг). Бундан ташқари, фойдаланувчилар булутли OneDrive файл-омборидан 1 терабайт жой ҳам олади.

Тошкентдаги «Малика» («Флешка») бозорида Microsoft Lumia 640 XL 1,8 миллион сўмга таклиф қилинмоқда.