Венгрияга чегара орқали кириб келган мингга яқин муҳожир вақтинчалик сақлаш лагерларида қолишдан бош тортди. Бу ҳақда «РИА Новости» хабар бермоқда.
Натижада қочоқлар ва ҳуқуқни муҳофаза қилиш органлари ходимлари ўртасида тўқнашувлар юз берган. Охир-оқибат қочоқлар полиция тўсиғини ёриб ўтиб, Венгриянинг Сегед шаҳри томон ҳаракатланишни бошлаган.
Бу қочоқлар ва венгер полициячилари ўртасидаги илк тўқнашув эмас. 8 сентябрь куни Сербиянинг чегараолди Субботица шаҳридан келган муҳожирларнинг бир қисми қочоқлар лагерига боришдан бош тортиб, полиция тўсиғини ёриб ўтган ва 180 километр масофада жойлашган пойтахт Будапешт томон юриш қилганди.
10 сентябрь куни Венгрия қуролли кучлари ноқонуний муҳожирларга қарши чораларни такомиллаштириш мақсадида махсус ўқув-ҳарбий машғулотларини бошлагани ҳақида хабар берилган эди. Шунингдек, мамлакат парламенти тиканли симлардан деворлар қурилиши бошланган чегарадаги назоратни кучайтириш масаласини кўриб чиқмоқда.
Сўнгги бир неча ойдан бери Европага қочоқларнинг оқиб келиши сезиларли кучайди. БМТ маълумотларига кўра, 2015 йил бошидан бери Европа Иттифоқига ноқонуний йўл билан кириб келган Яқин Шарқ ва Шимолий Африка мамлакатлари вакиллари сони 378 минг кишидан ошиб кетган. Прогнозларга кўра, яқин икки йил ичида Европага камида 850 минг қочоқ келади ва уларнинг асосий қисми Германияга жойлашади.
Изоҳ (0)