Россия ташқи ишлар вазири Сергей Лавров мамлакат президенти Владимир Путин БМТ Бош Ассамблеяси 70-сессиясида бир қатор мавзуларга, хусусан, санкциялар масаласига ҳам тўхталиб ўтишини маълум қилди. Бу ҳақда «Интерфакс» хабар бермоқда.
«Путин замонавий дунёнинг энг долзарб муаммолари бўйича Россиянинг принципиал нуқтаи назарларини баён қилади», — деди Лавров.
Шунингдек, Россия президенти БМТдаги бўлажак нутқида Сурия масаласи ва Украинадаги инқирозга ҳам тўхталиб ўтади, халқаро террорчиликка қарши курашга баҳо беради.
Путин сўнгги 10 йилдан бери биринчи марта БМТ Бош Ассамблеяси мажлисига йўл олаётган бўлиб, Лавровнинг изоҳлашича, бу юбилей сессия бўлгани ва унда жаҳоннинг аксарият мамлакатлари етакчилари қатнашиши сабаб, Путин унда иштирок этишга қарор қилган.
Аввалроқ Путин 28 сентябрь куни БМТ Бош Ассамблеясида нутқ билан чиқиш қилиши ҳақида хабар берилган эди.
Изоҳ (0)