Ўзбекистон Миллий кутубхонаси китоб музейи ҳар ойда ўз экспозициясини янгилаб боради, дея хабар бермоқда кутубхона расмий сайти. Шунга кўра, навбатдаги экспозиция шарқшунос олимларнинг асарларига бағишланди.
Экспозицияга Ўзбекистон Миллий кутубхонасининг «Қўлёзмалар, нодир ва алоҳида қимматга эга нашрлар»га бой фондида сақланаётган шарқшунос олимларнинг асарларини танлашда уларнинг нашр этилиш даври, ноёблиги, шунингдек, Шарқ фалсафаси, тилшунослиги, географияси, ҳуқуқшунослиги ва тарихи масалалари билан қизиққан Европа шарқшунос олимларининг асарларига эътибор қаратилди. Улар ичида энг қадимийси ХVII аср ўрталарида нашр этилган бўлиб, қолганлари асосан ХVIII ва XIX асрларни ташкил этмоқда.
Кўргазмадаги шарқшунос олимларнинг асарлари шарқшунослик фанининг турли йўналишларига бағишланган. Улар давлат ҳуқуқи, бошқарув тизими ва Шарқ қонунчилигини қиёсий таҳлил қилади, Миср, Яқин Шарқ ва Ҳиндистон олимларининг асарлари иқтибозларини илмий жиҳатдан изоҳлайди, шарқ тиллари грамматикасини таърифлайди ва турли хонликлар бошқаруви тарихини ва тузилишини ўрганади.
Музей экспозициясида шарқшунос мутахассислар учун қимматбаҳо ҳисобланган кўп жилдлик асарлар ҳамда маълумотнома сифатидаги манбаларга алоҳида ўрин ажратилган. Унда, асосан, Франция, Германия, Буюк Британия ва бошқа Европа шарқшунос олимлари томонидан яратилган асарлари ўрин олган.
Кўргазма жорий йилнинг 30 сентябрига қадар давом этади.
Изоҳ (0)