Британия Кенгаши раиси Тошкентга келди

Британия Кенгаши раиси сэр Вернон Жейм Эллис расмий ташриф билан Тошкентга келди. Ташрифдан мақсад Кенгашнинг Ўзбекистондаги фаолияти билан танишув ва келгусидаги ҳамкорликни муҳокама этишдан иборат. Бу ҳақда "Газета.uz" хабар бермоқда.

Ташриф чоғида Бош вазирнинг биринчи ўринбосари Рустам Азимов, халқ таълими вазири Улуғбек Иноятов, олий ва ўрта махсус таълим вазири Алишер Вахабов, маданият ва спорт ишлари вазири Баҳодир Аҳмедов ҳамда Савдо-саноат палатаси раиси Алишер Шайхов билан музокаралар ўтказилиши кўзда тутилган. Шуниндек, Ўзбекистондаги Британия Кенгаши лойиҳалари иштирокчилари ва ҳамкорлари билан ҳам учрашувлар режалаштирилган.

Эслатиб ўтамиз, дунёнинг 110 мамлакатида ваколатхоналари бўлган Британия Кенгаши Ўзбекистонда 1996 йилдан бери фаолият олиб бормоқда.