Ўзбекистон Президентининг 2015 йил 15 майдаги «Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида»ги фармони талабларини бажариш доирасида Вазирлар Маҳкамасининг 2015 йил 29 августдаги 250-сон қарори билан ҳукуматнинг 2004 йил 21 декабрдаги «‘Фуқароларнинг жамғариб бориладиган пенсия таъминоти тўғрисида’ги Ўзбекистон Республикаси Қонунини амалга ошириш чора-тадбирлари ҳақида»ги қарорига ўзгартириш ва қўшимчалар киритилди. Бу ҳақда «Norma.uz» хабар бермоқда.
Халқ банки томонидан фуқароларни жамғариб бориладиган пенсия тизимида шахсан ҳисобга олишни юритиш тартиби тўғрисида низомда иш берувчилар, шунингдек, меҳнат фаолиятини меҳнат шартномаси асосида амалга ошираётган фуқаролар учун жамғариб бориладиган пенсия тизимида қатнашиш мажбурий эканлиги белгилаб қўйилди.
Энди иш берувчи пенсия тизимида мажбурий тарзда қатнашаётган фуқароларни ёзма шаклда ёки Интерактив давлат хизматлари ягона порталининг шахсий «тадбиркорлик субъекти кабинети»да электрон шаклда ҳисобга қўяди.
Агар сўровнома ёзма тарзда расмийлаштирилган бўлса, фуқарони жамғариб бориладиган пенсия тизимида ҳисобга олиш, унинг учун шахсий жамғариб бориладиган пенсия ҳисобварағи очиш ва жамғариб бориладиган пенсия дафтарчасини расмийлаштириш ишлари уч кунда, агар Ягона портал орқали электрон шаклда расмийлаштирилган бўлса, Халқ банки томонидан бир кунда расмийлаштирилади.
Фуқарони жамғариб бориладиган пенсия тизимида ҳисобга қўйишда Халқ банки филиали уч иш куни мобайнида иш берувчига унинг ходимлари ҳисобга қўйилганлиги тўғрисида хабарномани ёзма ёки электрон шаклда юборади.
Изоҳ (0)