Ҳашаматли уйлар қурилишига жалб этилган исроиллик қурувчилар Ашкелонда Рим империясига даврига оид тош тобут — саркофаг топиб олди. Исроил қадимий осори-атиқалар бошқармаси пресс-релизида маълум қилинишича, қурувчилар тарихий топилмани ҳукуматдан яширгани учун ҳибсга олинган.
Мутахассислар тобутдаги бўртма суратлар (барелефлар) сабаб мазкур саркофагни камёб ва нодир, деб ҳисобламоқда. Тобут қопқоғининг бир томонида қадимги римликларга хос енгсиз узун кийим кийган ва сочи Рим услубида турмакланган эркак тасвирланган. Унинг кўзларига қадимги даврлардаёқ ўғирлаб кетилган қимматбаҳо тошлар ўрнатилган. Бошқа томонга эса ҳайкалтарош амфора ва ток новдаси тасвирини туширган.
Тобутнинг деворлари гулчамбарлар, буқа каллаларининг барелефлари, севги маъбудалари, шунингдек, қадимги Рим ақидалари бўйича марҳумлар ҳимоячиси ҳисобланган Медузанинг боши билан безатилган. Археологларнинг фикрича, мазкур тобутда бадавлат оила вакили дафн этилган ва саркофагдаги суратлардан хулоса қилинадиган бўлса, у яҳудийлик динига эътиқод қилмаган.
Қурувчилар саркофагни август ойи охирида топган. Улар топилмани трактор ёрдамида ердан чиқариб олиб (бу жараёнда саркофагга маълум бир даражада зарар етган), тахталар ва металл листлар остига яшириб қўйган, қурилишнинг ушбу қисмини эса — изларни йўқотиш мақсадида — бетонлаб ташлаган.
Бироқ ишчилардан бири мазкур ҳодиса ҳақида Исроил қадимий осори-атиқалар бошқармасига маълум қилган. 1 сентябрга ўтар кечаси қурилиш майдонида тинтув ўтказган амалдорлар ва полиция ходимлари беш қурувчини ҳибсга олган. Сўроқдан сўнг улар тобутни қазиб олиш жараёни тасвирланган фотосуратлар ва видеони ҳукумат вакилларига кўрсатган.
Исроил қонунчилигига мувофиқ, археологик топилмани яширганлик ва унга зарар етказганлик учун айбдор шахс беш йилгача озодликдан маҳрум этилиши мумкин. Терговчилар саркофагни махфий равишда қазиб олишни қурувчиларнинг ўзи эмас, балки қурилиш пудратчилари уюштирган, деган фикрда. Ҳозирда пудратчиларнинг икки нафари ҳибсга олинган.
Изоҳ (0)