Германиянинг Гессен ери ҳукумати раҳбари Фолкер Буффье 2015 йилда мамлакатга миллионга яқин муҳожир ва қочоқ келишини тахмин қилмоқда. Бу, «РИА Новости»нинг ёзишича, Германия ички ишлар вазири прогнозидаги кўрсаткичдан 200 минг кишига кўп.
Аввалроқ Германия ички ишлар вазири Томас де Мезьер 2015 йилда мамлакатга 800 минг нафаргача қочоқ ва муҳожирлар келиши кутилаётганини маълум қилганди. Вазирнинг сўзларига кўра, мазкур рақам 2014 йилги кўрсаткичлардан тўрт баробар кўп.
Германия муҳожирларнинг бу қадар катта оқими билан ҳали ҳеч қачон тўқнаш келмаган, бироқ Буффьенинг маълум қилишича, мамлакат бу масалани ижобий ҳал қила олади.
Европа Иттифоқининг Frontex чегара агентлиги маълумотларига кўра, 2015 йил бошидан бери Евроиттифоқ ҳудудига 340 минг муҳожир келган. Экспертларнинг фикрича, қитъанинг бир қатор мамлакатларида кузатилаётган ноқонуний муҳожирлар билан боғлиқ вазият Иккинчи жаҳон урушидан бери аҳоли кўчишига дахлдор энг ёмон инқироздир.
Изоҳ (0)