Ўзбекистон Миллий кутубхонасида 27 август куни «Кино оламига саёҳат» номли китоб-расмли кўргазма очилди. Кутубхона матбуот хизмати хабарига кўра, шу куни кутубхона киномарказида «Олтин тўплам» фондидан ўрин олган ўзбек миллий кинофильмлари намойиш этилди.
«Кино оламига саёҳат» кўргазмасида Ўзбекистонда кино санъатининг пайдо бўлиши, биринчи оммавий кино намойишлари, жаҳон кинематографиясида ёрқин из қолдирган биринчи ўзбек кино актёрлари ҳақида ҳикоя қилувчи китоблар, газета ва журналларда чоп этилган мақолалар намойиш этилди. Бундан ташқари, кўргазмага ташриф буюрган кутубхона фойдаланувчилари ўз севимли актёрлари, барча замонларда дунёга машҳур бўлган киноижодкорлар ҳаёти ва ижодига дахлдор маълумотларга эга бўлди.
Кўргазманинг иккинчи қисми ўзбек кинематографиясининг «Олтин тўплами»га кирган ўзбек киноси дурдоналарига бағишланган. Бунда асарлари асосида кинофильмлар яратилган ва йиллар давомида барчанинг севимли фильмларига айланган Алишер Навоийнинг «Фарҳод ва Ширин», «Лайли ва Мажнун», Абдулла Қодирийнинг «Ўтган кунлар», Ғафур Ғуломнинг «Шум бола», Тоҳир Маликнинг «Шайтанат», Худойберди Тўхтабоевнинг «Сеҳрли қалпоқча», Ўлмас Умарбековнинг «Фотима ва Зуҳра» китоблари ўрин олган.
Изоҳ (0)