Брюс Уиллис суратга олиш ишлари Лос-Анжелесда давом этаётган Вуди Алленнинг янги фильми актёрлари таркибидан чиқиб кетди. Deadline хабарига кўра, актёр бошқа лойиҳада бандлиги сабаб шу қарорга келган.
Нашр маълумотларига кўра, Уиллис Стивен Кингнинг «Misery» романи асосида саҳналаштирилган, премьераси шу йил кузда Бродвейда бўлиб ўтадиган спектаклга кўпроқ вақт ажратишни маъқул деб топган. Уиллис саҳнада автоҳалокатга учрайдиган ёзувчи Пол Шелдон ролини ижро этади.
Роман сюжетига кўра, ёзувчини унинг ашаддий ихлосманди, собиқ ҳамшира Энни Уилкс қутқариб қолади ва уни уйига олиб келиб, зарурат бўлмаса ҳам, ёзувчини уйида сақлаб ўтиради. Тез орада Шелдон қиз ўзини ғалати тутаётганини ҳис қилади.
Энди режиссёр Вуди Аллен ўз фильми учун Уиллис ўрнига бошқа актёр топиши ҳамда Уиллис иштирокидаги саҳналарни қайтадан тасвирга олиши керак бўлади.
Вуди Алленнинг янги лойиҳаси 2016 йилда катта экранларга чиқиши кутилмоқда, ҳозирча унинг номи ошкор этилмаяпти. Фильмда Кристен Стюарт, Жесси Айзенберг, Блейк Лайвли, Паркер Поузи ва бошқалар суратга тушмоқда.
Изоҳ (0)