Хитой миллий валютаси — юаннинг девалвация қилингани яқин ва узоқ хориж мамлакатлари миллий пул бирликларига салбий таъсир кўрсатмоқда. Бу ҳақда, Bloomberg агентлиги эълон қилган маълумотларга асосланиб, «ТАСС» хабар бермоқда.
Агентлик экспертларининг фикрича, Хитой Марказий банкининг юанни девалвация қилиш ҳақидаги қарори занжир реакциясини ишга туширган. Хусусан, Қозоғистон тенгесидан сўнг Арманистон драми ҳам қадрсизланиши мумкин. Сўнгги 12 ой давомида Арманистон валютаси 15 фоизга қадрсизланиб улгурди.
Тенгенинг қадрсизланиши Тожикистон ва Туркманистон миллий валюталари ҳолатига салбий таъсири қилиши мумкин. Bloomberg тахминига кўра, кейинги олти ой давомида тожик сомониси 10—20 фоизга, туркман манати эса 20 фоиз атрофида қадрсизланади. Қозоғистон билан яқин иқтисодий алоқаларга эгалиги сабаб, тенгенинг қадрсизланиши Қирғизистон сўмига ҳам таъсир ўтказмай қолмайди.
Bloomberg экспертларининг фикрича, Саудия Арабистони ва Нигерия валюталари ҳам зарба остида турибди — жаҳон бозоридаги нефт нархи сабаб, ҳар икки мамлакат миллий пул бирликлари 20 фоизгача қадрсизланиши кутилмоқда. Миср ва Туркиядаги беқарор вазият эса мос равишда фунт ва лиранинг ҳолатига салбий таъсир кўрсатиши мумкин.
Изоҳ (0)