Германияда ҳордиқ чиқараётган сайёҳлар Шимолий денгиздаги оролларнинг бирида камида 108 йил аввал шиша идишда юборилган хабарни топди. Бу ҳақда «РИА Новости» хабар бермоқда.
The Independent нашри маълумотларига кўра, шиша идишни Германияга дам олиш учун келган пенсионер эр-хотин Амрум ороли қирғоқларидан топиб олган. Идиш ичида: «Шишани синдиринг», деб ёзилган қоғоз бўлган.
«Эрим Хорст шиша ичидаги хабарни эҳтиёткорлик билан олишга уринди, бироқ буни уддалаб бўлмади, шу сабабли ҳам биз кўрсатмага амал қилишга мажбур бўлдик», — деди шишани топган аёл.
Топилманинг ичида инглиз, голланд ва немис тилларида шундай мазмундаги матн ёзилган почта откриткаси чиққан: шишани топган кишидан уни қаерда, қачон ва қай ҳолатда топгани ҳақида билдириб, сўнг бу откриткани Британиянинг Плимут шаҳрига — Буюк Британия Денгиз биологияси уюшмасига юбориш сўралган.
Қайд этишларича, уюшма томонидан ичига хабар ёзилган мингдан ортиқ бундай шиша идишлар, денгиз оқимларини ўрганиш мақсадида, 1904—1906 йиллар давомида Шимолий денгизга ташланган. The Independent’нинг тахминича, Германиядан топилган бу шиша шундай топилмаларнинг жаҳондаги энг қадимийси ҳисобланади. Бунгача эса денгизда 99 йилдан ортиқ сузиб юрган хабарли шиша идиш Гиннеснинг рекордлар китобидан ўрин олганди.
Изоҳ (0)