АҚШ Миллий хавфсизлик агентлиги томонидан олиб борилган глобал кузатув кўплаб давлат арбобларининг мобил гаджетларга бўлган муносабатини қайта кўриб чиқишга мажбур қилди. «Gazeta.ru» томонидан тайёрланган қуйидаги мақолада жаҳон давлатлари етакчилари қандай смартфонлардан фойдаланиши ҳақида маълумот олишингиз мумкин.
BlackBerry2013 йили Германия канцлери Ангела Меркелнинг смартфонига бузиб кирилгани маълум бўлганидан сўнг, унинг маъмурияти ўз iPhone’ларини тизимли равишда BlackBerry’нинг Z10s моделига алмаштирди. Германия ҳукумати томонидан бир донасининг нархи 2,5 минг евро бўлган 5 мингта BlackBerry Z10s сотиб олинди — уларнинг бари 256 битли шифрлаш ва хабарларни хавфсиз узатиш функцияси, шунингдек, қўшимча ҳимоя воситаларига эга махсус micro-SD карта билан таъминланган эди.
Бироқ Меркелнинг ўзи тўлиқ кўринишдаги QWERTY-клавиатурага эга BlackBerry Q10 моделини танлади. Мазкур смартфон ҳам яхши ҳимояланган ва ахборотларни махсус ички VPN-уланиш орқали узатади.
Барак Обама смартфондан фойдаланиш учун Махсус хизматлар рухсатномасини олган илк АҚШ президенти ҳисобланади ва у ҳам BlackBerry’ни танлаган. Обама иккита — BlackBerry Curve 8900 ва BlackBerry Q10 смартфонларидан фойдаланади, айни вақтда унга iPhone’дан фойдаланиш қатъий тақиқланган. Шунга қарамай, АҚШ президенти Apple маҳсулотлари ихлосмандидир, унинг iPad планшети ва MacBook ноутбуки бор.
Буюк Британия бош вазири Дэвид Кэмерон ва унинг покистонлик ҳамкасби Наваз Шариф ҳам BlackBerry’дан фойдаланишни маъқул кўради.
Маҳаллий маҳсулотни қўллаб-қувватловчиларЭдвард Сноуден АҚШ махсус хизматлари Франция президентлари Жак Ширак, Николя Саркози ва Франсуа Олланднинг телефон суҳбатларини тинглаб боргани ҳақидаги ахборотни ошкор қилганидан сўнг, Франция ҳукумати мудофаа соҳасида ишловчи Thales компанияси томонидан ишлаб чиқилган Teorem — юқори даражада ҳимояланган, ҳарбий криптографияли мобил телефонларидан 14 минг дона сотиб олди. Мазкур телефонлардан муҳим ҳукумат қўнғироқларидан фойдаланади, одатий ҳаётида эса Франсуа Олланд iPhone 5s ишлатади.
Россия президенти Владимир Путин, ўзининг тан олишича, смартфонлардан фойдаланмайди, бироқ у ҳар доим маҳаллий ишлаб чиқарувчиларни қўллаб-қувватлашга тайёр. 2012 йили Путин омма олдида МТСнинг «Глонасс 945» Android-смартфони билан пайдо бўлганди, 2014 йил охирида эса президентга YotaPhone 2 тақдим этилди, у эса бу қурилмани Хитой раҳбари Си Цзиньпинга совға қилганди.
Цзиньпиннинг ўзи қандай смартфондан фойдаланиши маълум эмас, бироқ унинг турмуш ўртоғи омма олдида iPhone 5 смартфони билан чиқиш қилган.
Дмитрий Медведев ва унинг гаджетлариРоссиянинг техника ва технологиялардан фойдаланиш бўйича энг илғор сиёсий арбоби ҳисобланган Дмитрий Медведев iPhone 4’ни бевосита Стив Жобснинг қўлидан қабул қилиб олган, 2011 йилдан бери iPad’дан фойдаланади. Россия бош вазири кейинчалик Samsung Galaxy S4 ва iPhone 5 ишлатди. Ҳозир эса у iPhone 6’дан фойдаланади. Шунингдек, у Apple Watch соатлари билан омма олдига чиқиш қилган дастлабки машҳур шахслардан бири бўлганди.
Эътиборли томони, Россия махсус хизматлари мамлакат амалдорларига Apple маҳсулотларидан фойдаланишни тавсия этмайди, чунки бу қурилмалар россияликларнинг шахсий маълумотларини Россия ҳудудида сақлаш тўғрисидаги қонунчилик талабларига мувофиқ эмас.
HTC ва LumiaАксарият одамлар «Шимолий Корея етакчиси Ким Чен Ин умуман мобил телефонлардан фойдаланмаса керак», деган гумонга ҳам борган бўлиши мумкин. Бироқ суратларнинг бирида КХДР раҳбари олдида қора, кўп жиҳатдан HTC’ни ёдга соладиган смартфон турганини кўриш мумкин. Афтидан, Тайвань компанияси маҳсулотларидан фойдаланиш Корея Меҳнат партияси етакчисининг эътиқодига зид келмайди.
Жаҳон етакчилари маъқул кўрадиган смартфонлар орасида Nokia/Microsoft маҳсулотлари ҳам бор. Хусусан, Рим папаси Франциск катта диний маросимларни Lumia 900 смартфони ёрдамида суратга туширган.
Таиланднинг 28-бош вазири ва ушбу лавозимни эгаллаган илк аёл ҳисобланган Йинглак Чиннават эса бир вақтнинг ўзида бешта смартфондан фойдаланарди, улардан бири Lumia 920 қурилмаси эди.
Изоҳ (0)