2015 йил июль ойи охирида хиёнаткор эркак ва аёллар учун мўлжалланган сайтни бузиб кирган хакерлар ўғирланган маълумотларни файл алмашиш тармоғига жойлаштирди. Бу ҳақда Wired хабар бермоқда.
Қарийб 10 гигабайт ҳажмдаги архивда Ashleymadison.com сайтининг 32 миллион нафар фойдаланувчисининг шахсий маълумотлари бор. Бу сайтда уйланган эркаклар ва эрга теккан аёллар ўз турмуш ўртоғига хиёнат қилиш мақсадида янги таниш орттирган.
Ўзини The Impact Team деб номлаган хакерлик гуруҳи, архивни чоп этиш билан бирга ўз ҳаракатларини изоҳлаб берган, шунингдек, сайт фойдаланувчиларининг 90—95 фоизи эркаклар эканлигини маълум қилган. Мурожаатнинг сўнгги қисми фойдаланувчиларга қаратилган — хакерлар фойдаланувчиларнинг махфий шахсий маълумотларини сақлай билмагани учун Ashleymadison.com сайти эгаларини судга беришга чақирган.
Хиёнаткорлар учун мўлжалланган сайт маълумотлар базаси 2015 йил 20 июль куни ўғирланган эди. Ўшандаёқ The Impact Team фойдаланувчиларнинг шахсий ахборотлари ўғирлангани исботи сифатида бир қисм маълумотларни чоп этган ва Ashleymadison.com сайти эгаларидан иккита сайтни ёпишни талаб қилганди.
Ashley Madison сайти Avid Life Media компанияси лойиҳаларидан бири ҳисобланади. Avid Life Media катталар учун мўлжалланган танишувлари орқали даромад қилади. 2015 йилда компания эгалик қилувчи сайтларнинг умумий аудиторияси 50 миллион фойдаланувчидан ошиб кетди.
Изоҳ (0)