Хитой ҳукумати Тяньцзиндаги портлаш ҳақида миш-миш тарқатган 50 сайтни блок қилди

Хитой ҳукумати Тяньцзиндаги портлашлардан сўнг, интернетда миш-миш тарқалишига қарши кураш мақсадида 50 та сайтни блок қилди. Бу ҳақда «Newskaz.ru» хабар бермоқда.

Хитой кибермакон маъмурияти 50 та сайтни текширилмаган ахборотни чоп этиш орқали ваҳима келтириб чиқариш ва ёлғон миш-миш тарқатиш орқали аҳолига салбий таъсир кўрсатишда айбдор, деб топган. Маъмурият 18 та сайтни лицензиядан маҳрум этган ва блок қилган, яна 32 ресурс фаолияти тўхтатилган.

15 август, шанба куни Хитой ҳукумати портлашлардан сўнг эгалари миш-миш тарқатганликда гумон қилинган ижтимоий тармоқлардаги 360 дан ортиқ аккаунтни блок қилганди.

Кибермакон маъмуриятининг изоҳига кўра, портлашлардан сўнг Sina Weibo микроблоглар хизмати ва мулоқот учун мўлжалланган WeChat илова-дастурида баъзи фойдаланувчилар, хусусан, мамлакатда таниқли блогерлар томонидан ҳам «дўкон ва бозорлар тунаб кетилган» ва «портлаш жойидан бир километр масофада ҳеч ким тирик қолмаган» қабилида хабарлар қолдирилган.

Кибермакон маъмурияти вакилларининг маълум қилишича, миш-миш тарқатиш билан шуғулланаётган алоҳида шахслар ва ташкилотларга нисбатан тегишли чоралар кўрилади.