Тошкент шаҳридаги Инҳа университетида 2016 йилнинг сентябрь ойидан янги йўналиш – логистика факультети иш бошлайди, дея хабар бермоқда ЎзА. Ўзбекистон алоқа тарихи музейида Тошкент шаҳридаги Инҳа университети раҳбарияти ва Инҳа университети (Жанубий Корея) делегацияси вакиллари иштирокида бўлиб ўтган матбуот анжуманида шу ҳақда маълум қилинди.
Тадбирда талабалар учун университетда яратилган шароитлар, жорий йилги кириш имтиҳонлари натижалари, иқтидорли ёшлар учун тақдим этилаётган имтиёзлар тизими хусусида сўз юритилди.
Олий ўқув юрти вакилларининг фикрига кўра, кириш имтиҳонларида қайд этилган аъло натижалар кўп жиҳатдан университетда абитуриентлар учун махсус тайёрлов курслари ташкил этилгани билан боғлиқ. Шуниси эътиборлики, энг яхши натижа кўрсатган тингловчилар курсни тамомлагач, имтиҳон топширмасдан ўқишга қабул қилинди.
– Ўзбекистон ёшларининг муваффақияти ҳавасимизни келтирмоқда, – дейди Инха университети президенти Суня Чой. – Тошкент шаҳридаги Инҳа университетида таълим олаётган ҳар бир йигит-қиз Жанубий Кореядаги асосий олий ўқув юрти талабаси ҳисобланади ва барча тегишли имтиёзлардан фойдаланади. Логистика факультетининг очилиши ҳам муҳим. Зеро, мамлакатингизда бу йўналишга талаб ортиб бормоқда.
Изоҳ (0)