Тошкентда 2022 йилгача 1000 та лифт алмаштирилади

Тошкентда 2016—2021 йилларда шаҳар бюджети маблағлари ҳисобидан кўп хонадонли турар-жойлардаги 1000 та лифтни алмаштириш режалаштирилмоқда, дея хабар берди «Gazeta.uz».

Лифтларни алмаштириш дастури Ўзбекистон ҳукуматининг 10 августдаги қарори билан тасдиқланди. Дастур мақсади аҳоли яшаши учун қулай ва хавфсиз шароит яратиш, шунингдек, аварияли ҳолатлар олдини олишдан иборат.

Лойиҳанинг дастлабки қиймати 85,769 миллиард сўмдан ошади. Дастурга кўра, Бектемир туманида 18 та, Миробод туманида 83 та, Мирзо Улуғбек туманида 136 та, Олмазор туманида 62 та, Сергели туманида 130 та, Учтепа туманида 40 та, Чилонзор туманида 131 та, Шайхонтоҳур туманида 114 та, Юнусобод туманида 121 та, Яккасарой туманида 58 та ва Яшнобод туманида 107 та лифтни алмаштириш кўзда тутилган.