Қўқонлик тадбиркорнинг 60 миллион сўм ипотека кредити олганини эшитган унинг ўртоғи пластик карточкадаги пулни нақдлаштириб беришни ваъда қилиб, бир неча ойда 32 миллион сўмни бўлиб-бўлиб берди. Шу тариқа у оғайнисининг ишончини «оқлади», деб ёзади «Ҳуқуқ» газетаси.
Тадбиркор Туркияга савдо иши билан кетаётганида Spark автомашинасини унинг дўсти «тирикчилик» учун олиб турди. Аммо қайтиб келганида унинг дўсти машинани гаровга қўйиб, 4 500 АҚШ доллари қарз олганини, тез кунларда автоуловни қайтариб беришини айтди. Тадбиркор узоқ вақт ўз дўстидан қуруқ ваъдалар олиб юрганидан сўнг, ниҳоят оғайниси чув туширганини тушуниб етди.
Нашр қайд этишича, дастлабки терговда фирибгар бошқа бир одамни ҳам алдаб юргани маълум бўлди. У Қўқон шаҳри, Муштарий кўчасида иккита уйини сотмоқчи бўлган одамни чув туширган. Фирибгар 150 миллион сўмга баҳоланган уйни сотиб олишини, кредит олишга пули етмаётганини айтган ва дўстига тегишли Spark машинасини гаровга қўйиб, уй соҳибидан қарз олган.
Суд мажлисида фирибгар айбига иқрор бўлди. У уйини сотмоқчи бўлган кишининг 69 500 000 сўм, дўстининг 27 500 000 сўм пулини фирибгарлик билан қўлга киритганлиги маълум бўлди. Суд судланувчидан жабрланувчиларга етказилган зарарни ундирган ҳолда, уни беш йил муддатга озодликдан маҳрум этишга ҳукм қилди.
Изоҳ (0)