Жорий йилнинг 30 июль куни Россия Федерациясининг Новосибирск шаҳри бош имом-хатиби Салим Шакирзяновнинг таклифи билан ўзбекистонлик имом-хатиблардан тўрт нафари Россия Федерациясига жўнаб кетди, деб хабар беради Дин ишлари бўйича қўмита матбуот хизмати.
Улар Россия мусулмонлари идораси масъуллари билан биргаликда, Россия Федерациясининг Новосибирск шаҳридаги «Оқ масжид», «Мечеть Новониколаевского Магометанского обшчества» ва «Мунира» масжидларида жума намозини адо этди.
Салоҳиддин Шарипов Новосибирск шаҳридаги «Хилогский» бозорида жойлашган масжидда 1000 кишилик жамоатда, Одилхон Исмоилов Томск шаҳридаги «Оқ масжид» жомеъ масжидида 500 кишилик жамоатда, Жасурбек Раупов Кемерово шаҳридаги Кемерово вилояти мусулмонлари диний идорасининг муфтийси, «Мунира» жомеъ масжиди имом-хатиби Бикчантаев Тагир ташкил этган конференцияда ҳамда Иброҳим Иномов Новосибирск шаҳридаги «Мечеть Новониколаевского Магометанского обшчества» номли масжидда 350 кишилик жамоатда Ўзбекистон мусулмонлари идораси томонидан берилган тезис асосида маъруза қилди.
Маърифий суҳбатлар давомида, Ўзбекистон мусулмонлари идораси раиси ўринбосари, исломшунос олим Айдарбек Тулеповнинг «ИШИД фитнаси» ва «Интернетга ин қурган ўргимчаклар» номли китобларининг мазмун-моҳияти ёритилиб, мазкур китоблардан масжидларнинг кутубхоналарига совға қилинди.
Томск, Кемерово ва Новосибирскдаги масжидларнинг имом-хатиб ва масъул ходимлари, ўзбекистонлик имом-хатибларга ҳамда Ўзбекистон мусулмонлари идораси номига миннатдорчилик билдирди.
Изоҳ (0)