Корея Республикаси ҳукумати Шимолий Корея уюштираётган фитналарнинг олдини олишга қодир. Пхеньянга қайтариладиган жавоб ҳаракатларининг турли кўринишлари ўрганиб чиқилмоқда. Бу ҳақда мамлакат президенти Пак Кин Хе Сеулда бўлиб ўтган уруш фахрийлари билан учрашувда маълум қилган, дея хабар беради «ТАСС».
Эслатиб ўтамиз, 4 августда икки Корея ўртасидаги чегара вазифасини ўтовчи ҳудудда пиёдаларга қарши учта мина портлаши оқибатида жанубий кореялик икки ҳарбий жиддий жароҳат олди. Суриштирув натижалари миналар Шимолий Кореяда тайёрлангани ва атайин чегарачилар йўлига қўйилганини кўрсатди.
Жавоб ҳаракати сифатида Корея Республикаси КХДР ҳудудига тарғибот эшиттиришлари тарқатишни бошлади. Бундай эшиттиришларни узатиш 11 йил аввал икки давлат ўртасидаги муносабатларда илиқлик сезила бошланганда тўхтатилган эди. Энди радиокарнайлар орқали шимол томонга Жанубий Корея ҳаётига оид янгиликлар ҳамда Пхеньян содир этаётган ноқонуний хатти-ҳаракатлар тўғрисидаги хабарлар бериб борилади.
Изоҳ (0)