Россиянинг «НТВ-Плюс» телеканали шарҳловчиси Василий Уткин «Эхо Москви» радиоканалининг «Футбольний клуб» дастурида бир гуруҳ мансабдорлар миллиардер Алишер Усмоновдан Москванинг «Динамо» футбол клуби харажатларини тўлаб беришни сўраётганликларини маълум қилди. Бу ҳақда «Gazeta.ru» хабар бермоқда.
«‘Динамо’нинг катта қарзи борлигини аниқ биламан. Аниқроғи, қарз эмас, камомад. Маълум бўлишича, қайсидир вазиятда ‘Динамо’ раҳбарлигини қўлга олган Борис Ротенберг жамоага ўз пулларини тикмаган. Пулларни ‘Внешторгбанк’ (ВТБ) тўлаган. Ротенбергнинг ўзи ажратган пуллар эса кредит сифатида расмийлаштирилган. Охири ВТБ шундай деган: ‘Йигитлар, бўлди энди. Бизнинг бошқа ишларимиз ҳам бор’», — деди Уткин.
«Ҳозир бир қатор муҳим одамлар — уларнинг асосий қисми ҳуқуқни муҳофаза қилиш идоралари ходимлари — Алишер Бурҳонович Усмоновни ‘Динамо’нинг харажатларини тўлаб беришга ё кўндиришмоқчи, ё мажбур қилишмоқчи, ё ундашмоқчи, ё сўрашмоқчи, ёки унга тиз чўкиб, ялинишмоқчи — аниғини билмайман. Лекин шундай жараён кетмоқда. Билишимча, бу жараён ялинаётганлар фойдасига ишламаяпти ҳозирча. Мендаги бу ахборот расмий эмас, бироқ аниқ ахборот», — дея қўшимча қилди Уткин.
Изоҳ (0)