Россия Жамоатчилик палатаси БРИКС мамлакатлари ҳудудида 14 ёшдан 35 ёшгача бўлган шахслар учун визасиз тартиб жорий этилиши ҳақидаги ташаббусни қўллаб-қувватлашни сўраб, Россия ташқи ишлар вазири Сергей Лавровга мактуб йўллади. Бу ҳақда «РИА Новости» хабар бермоқда.
Палатанинг жамоатчилик дипломатиясини ривожлантириш ва хориждаги ватандошларни қўллаб-қувватлаш бўйича комиссияси раиси Елена Суторминанинг сўзларига кўра, ёшлар учун визасиз тартибнинг жорий этилиши тадбиркорлик, таълим дастурлари, талабалар алмашинувлари, малака ошириш, форум ва конгресслар ривожланишига кўмак беради, шунингдек, мамлакатлар ўртасидаги сайёҳлик оқимларини жонлантиради.
Ўз навбатида, Россия Ташқи ишлар вазирлиги ҳозирча идора олдида тартибни тўлиқ визасиз қилиш вазифаси йўқлигини, бироқ тартибни юмшатиш йўлида ҳаракатлар олиб борилаётганини маълум қилди.
Эслатиб ўтамиз, БРИКС мамлакатлари ҳудудида ёшлар учун визасиз тартиб жорий этилиши ҳақидаги ташаббус 26—29 июль кунлари Уфада бўлиб ўтган БРИКС ва ШҲТ мамлакатлари Ёшларининг биринчи форумида илгари сурилган эди. Маълумот учун, БРИКС — Бразилия, Россия, Ҳиндистон, Хитой ва Жанубий Африка Республикаси биргаликда тузган ташкилотдир.
Изоҳ (0)