Россиянинг Курск вилоятида истиқомат қилувчи фермер аёл, давлат унга ҳеч қандай ёрдам бермагани сабаб, бутун буғдой ҳосилини ёқиб юбориш билан Россия президенти Владимир Путинга таҳдид қилди. Бу ҳақда «Корреспондент.net» хабар бермоқда.
Фермер аёлнинг видеомурожаатида қайд этилишича, унга «Сбербанк» ва «Россельхозбанк» каби давлат банклари кредит беришдан бош тортган, кейинроқ эса маҳаллий давлат органлари ҳам ёрдамдан қочган.
Шунга қарамай, фермер 60 гектар майдонга буғдой экиб, ундиришга муваффақ бўлган. Бироқ ҳосилни йиғиб олиш ҳамда сақлаш учун маблағ қолмаган.
«Бу далани ёқиб юборишга қарор қилдик, чунки бошқа чора қолмади. Олибсотарларга арзимаган пулга сотиб юборишдан маъно кўрмаяпман. Бу ишни журналистларни таклиф қилиб, оммавий тарзда амалга ошираман», — деди фермер.
«Токи, ўз ҳаётини фермер хўжалиги билан боғламоқчи бўлган бошқа одамлар ҳам кўриб қўйсин: уларнинг ҳаракати аслида ҳам шунга арзийдими? Президент тасдиқлаган дастурлар Курск вилоятида қандай бажарилаётганини бошқалар ҳам кўрсин», — дея қўшимча қилди аёл.
Изоҳ (0)