Жанубий Кореяда Олимпиада ўйинлари дастуридан ўрин олган Таэквондонинг WTF йўналиши бўйича ўтказилган Корея очиқ чемпионатида ўзбекистонлик спортчилар 19 та олтин, 16 та кумуш ва 10 та бронза медалига сазовор бўлди, деб хабар қилади Ўзбекистон Миллий олимпия қўмитаси.
Дунёнинг 72 давлатидан келган 2236 нафар спортчи иштирокида бўлиб ўтган Korea Open катталар, ёшлар ва ўсмирлар ўртасида ўтказилиб, катталар ўртасида бўлиб ўтган мусобақада 2016 йилги Олимпиада ўйинларининг йўлланмалари учун рейтинг очколар ҳам ўйналди.
Мазкур мусобақада амалдаги жаҳон чемпиони, Осиё ўйинлари совриндори Дмитрий Шокин (+87 кг), Осиё ўйинлари ғолиби, жаҳон чемпионати совриндори Жасур Бойқўзиев (-87 кг) ва Мустафо Валиев (-58 кг) барча рақибларини мағлуб этиб, олтин медалга сазовор бўлди. Яна бир ўзбекистонлик тажрибали спортчи Никита Рафалович вазни 80 килограммгача бўлган таэквондочилар мусобақасида ярим финалга қадар етиб келди ва бронза медали билан тақдирланди.
Ёшлар, ўсмирлар ва пумсэ йўналиши бўйича бўлиб ўтган мусобақаларда эса Ўзбекистон шарафини ҳимоя қилган спортчилар 16 та олтин, 16 та кумуш ва 9 та бронза медалини қўлга киритди.
Шу тариқа, Таэквондо ватанида ўтказилган навбатдаги йирик мусобақада Ўзбекистон таэквондо усталари жами 45 та медалга сазовор бўлди.
Изоҳ (0)