Швейцария полицияси британиялик қизиқчи Саймон Бродкинга Халқаро футбол федерациялари (ФИФА) раҳбари Йозеф Блаттер устидан сочилган 600 долларни қайтариб берди. Бу ҳақда қизиқчининг ўзи The Telegraph нашрига хабар қилди.
Эслатиб ўтамиз, Саймон Бродкинга қарши жиноят иши очилган. Тез орада у суд олдида жавоб беради.
«Афсуску, иш жиддий ва мени суд қилишади. ФИФАдаги коррупция иши бўйича қамоққа тушган биринчи одам мен бўлсам, жуда кулгули бўлади», — деди Бродкин.
Ли Нельсон тахаллуси остида чиқиш қилувчи шоумен ФИФА раҳбарининг Цюрихдаги матбуот анжуманини бузишга уринганидан кейин қўлга олинганди. Блаттер жамоатчилик билан алоқалар бўлими директори билан залда пайдо бўлганида қизиқчи саҳнага чиқди ва амалдорнинг устидан пул сочиб юборди. Бродкин сўзларига кўра, бу футбол бўйича 2026 йилги жаҳон чемпионатини ўтказиш истагидаги КХДРнинг пораси бўлган.
Уни дарҳол ФИФА раҳбарининг қўриқчилари қўлга олди ва қизиқчини залдан олиб чиқиб кетди. Кейинроқ у полиция қўлига топширилди.
2014 йили Саймон ЖЧ—2014 турнирига йўл олаётган Англия термаси самолётига чиқишига бир баҳя қолганди. Охирги лаҳзаларда полиция уни лайнерга йўл олган футболчилар орасидан ажратиб олганди. 2013 йилда эса уни қўриқчилар қўлга олгунига қадар, Саймон Бродкин «Манчестер Сити» футболчилари билан машғулот ўтказганди.
Изоҳ (0)