Ўзбекистон Миллий олимпия қўмитаси матбуот хизмати Республика спорт тиббиёти илмий-амалий марказининг фотогалереясини тақдим этди.
Ўзбекистон Миллий олимпия қўмитаси биносида жойлашган ушбу спорт тиббиёти маркази 5 бўлимдан иборат бўлиб, бу ерда 585 турдаги энг замонавий тиббий махсус асбоб-ускуналар ўрнатилган.
Шу ўринда алоҳида таъкидлаб ўтиш жоизки, бундай тиббий-биологик марказлар дунёнинг саноқли давлатларидагина мавжуд.
Республика спорт тиббиёти илмий-амалий марказида нафақат ўзбекистонлик, балки хориждан таклиф этилган етакчи шифокорлар ҳам фаолият олиб боради. Марказда спортчилар ва спорт жамоаларига, шунингдек, республика аҳолисига, хорижий фуқароларга диагностика ва даволаш сифатининг тасдиқланган стандартларига риоя қилиш шарти билан амбулатор тиббий ёрдамнинг барча турларини, шу жумладан диагностик ва лаборатория тадқиқотлари ўтказиш бўйича хизмат кўрсатилади.
Республика спорт тиббиёти илмий амалий-маркази расман фаолиятини бошлагандан сўнг, ўтган қисқа вақт ичида бу ерга Халқаро олимпия қўмитаси президенти Томас Бах, Миллий олимпия қўмиталари ассоциацияси раҳбари, Осиё олимпия кенгаши президенти Шайх Аҳмад ал-Фаҳад ал-Сабоҳ, шунингдек, спортнинг қатор турлари бўйича халқаро спорт федерацияларининг раҳбарлари ташриф буюриб, бу ерда яратилган шароитларга юқори баҳо берди.
Республика спорт тиббиёти илмий-амалий марказида бошқа спорт тиббиёти марказларидан фарқли равишда, бу ерда спортчиларга барча текширишлар, жумладан, нурли ташҳис, компьютер томографияси, магнит резонанс томографияси (МРТ) текширувларидан ўтиш, зарур дори-дармон ва замонавий боғлов материалларини харид қилиш имкониятлари яратилган.
Изоҳ (0)