Жанубий Кореяда Олимпиада ўйинлари дастуридан ўрин олган таэквондонинг WTF йўналиши бўйича ўтказилаётган нуфузли Korea Open халқаро турнирида ғолиблик шоҳсупасига кўтарилаётган ўзбекистонлик спортчилар сафи кенгайиб бормоқда, деб хабар қилади Ўзбекистон Миллий олимпия қўмитаси матбуот хизмати.
Олдинроқ энг оғир вазнли (+87 кг) спортчилар ўртасидаги мусобақада Ўзбекистон шарафини ҳимоя қилган амалдаги жаҳон чемпиони Дмитрий Шокин камида бронза медалини нақд қилганини маълум қилгандик.
Дмитрий Шокин бугун, 24 июлда дунёда тенгсиз таэквондо устаси эканлигини яна бир бора исботлади ва ўз коллекциясига навбатдаги олтин медални қўшиб қўйди.
Эслатиб ўтамиз, 2016 йили ўтказиладиган XXXI ёзги Олимпиада ўйинларининг йўлланмалари учун рейтинг очколар ўйналаётган мазкур мусобақанинг дастлабки кунги баҳсларида Жасур Бойқўзиев (-87 кг) олтин медалга сазовор бўлган эди.
Яна бир маълумот. Мазкур халқаро турнирда ёшлар ва ўсмирлар ўртасида ҳам мусобақалар ўтказилмоқда. Эътиборлиси, ўсмирлар ўртасида ўтказилаётган мусобақада ўзбекистонлик Севинч Муҳаммаджонова олтин медалга сазовор бўлди.
Изоҳ (0)