Ўзбекистонлик боксчи Хуршид Тожибоев 2016 йилги Олимпиада ўйинларига йўлланма олди

18 июль куни Тошкентдаги «Ўзбекистон» спорт саройида бокс бўйича APB (AIBA Pro Boxing) мусобақасининг 60 килограммгача бўлган вазн тоифасида биринчи босқичнинг иккинчи учрашувлари ўтказилди, деб хабар беради Ўзбекистон Миллий олимпия қўмитаси матбуот хизмати.

Унда ўзбекистонлик Хуршид Тожибоев россиялик Дмитрий Полянский билан 2016 йил Рио-де-Жанейро шаҳри (Бразилия)да ўтказиладиган Олимпиада ўйинларининг йўлланмаси учун рингга кўтарилди.

Бу икки тажрибали чарм қўлқоп усталари ўртасидаги жанг кутилганидек ўта муросасиз руҳда ўтди ва унда Хуршид Тожибоевнинг қўли баланд келди.

Шундай қилиб, Рио—2016 ўйинларига йўлланма олган ўзбекистонлик спортчилар сафи яна биттага кенгайди.

Ушбу кечада, шунингдек, рейтинг жанглар ҳам ўтказилди. Унда филиппинлик Чарли Суарес италиялик Доменико Валентинони (Италия), Читу Шафиқ (Бенин) эса Артур Брил (Германия)ни очколар ҳисобига мағлубиятга учратди. Дэвид Жойс (Ирландия) ва Робсон Консейсао (Бразилия) жанги дуранг натижа билан якунига етди.

Маълумот учун. Жорий йилнинг 30 май куни Тошкентда APB (AIBA Pro Boxing) мусобақасининг 60 килограммгача бўлган вазн тоифасида бўлиб ўтган дастлабки учрашувида Хуршид Тожибоев ирландиялик Дэвид Жойсни 3:0 ҳисобида мағлуб этган эди. Ушбу жангларнинг учинчи босқич яъни финалида ғолибликни қўлга киритган боксчи чемпионлик камарига эга бўлади. Бу учрашув ҳам Тошкентда 19 сентябрь куни бўлиб ўтади.