КХДР АҚШнинг ракетага қарши кўчма мажмуалари (THAAD)ни Жанубий Корея ҳудудига жойлаштирилишига ўз «ядровий кучлари» қудратини ошириш билан жавоб беради. Бу ҳақда «РИА Новости» хабар бермоқда.
Аввалроқ Жанубий Корея матбуоти Корея яриморолида юзага келиши мумкин бўлган фавқулодда вазият эҳтимолини ҳисобга олиб, АҚШ мамлакат ҳудудига ўрта масофага мўлжалланган ракеталарни тутиб қолиш имконини берадиган THAAD мажмуаларини жойлаштириши мумкинлиги ҳақида хабар берганди.
«Бизнинг армиямиз ва халқимиз Жанубий Кореяга THAAD мажмуаларини жойлаштириш билан боғлиқ АҚШнинг кирдикорларини диққат билан кузатмоқда, ўз навбатида энг илғор зарба йўллаш воситалари устидаги ишланмаларни давом эттирмоқда ҳамда ядровий кучларимиз қудратини юз баробар оширишга интилмоқда», - дейилади 3 июль, жума куни КХДРнинг марказий «Нодон синмун» газетасида эълон қилинган мақолада.
Нашр фикрича, Жанубий Кореяга THAAD мажмуаларининг жойлаштирилиши Кореяга қўшни давлатлар ва АҚШ ўртасидаги ҳарбий таҳдид даражасини ошириб юборади, улар орасида тўқнашувлар юз берадиган бўлса, америкаликларнинг Осиё-Тинч океани ҳавзасидаги «ядровий қўрғони» сифатида Корея яриморолининг жанубий қисми АҚШ душманлари томонидан биринчи нишонга айланади.
«Нодон синмун»нинг қайд этишича, Жанубий Кореяга Американинг ракетага қарши кўчма мажмуаларининг жойлаштирилиши минтақадаги кучлар мувозанатини бузади.
Изоҳ (0)