KXDR AQShning raketaga qarshi ko‘chma majmualari (THAAD)ni Janubiy Koreya hududiga joylashtirilishiga o‘z “yadroviy kuchlari” qudratini oshirish bilan javob beradi. Bu haqda “RIA Novosti” xabar bermoqda.
Avvalroq Janubiy Koreya matbuoti Koreya yarimorolida yuzaga kelishi mumkin bo‘lgan favqulodda vaziyat ehtimolini hisobga olib, AQSh mamlakat hududiga o‘rta masofaga mo‘ljallangan raketalarni tutib qolish imkonini beradigan THAAD majmualarini joylashtirishi mumkinligi haqida xabar bergandi.
“Bizning armiyamiz va xalqimiz Janubiy Koreyaga THAAD majmualarini joylashtirish bilan bog‘liq AQShning kirdikorlarini diqqat bilan kuzatmoqda, o‘z navbatida eng ilg‘or zarba yo‘llash vositalari ustidagi ishlanmalarni davom ettirmoqda hamda yadroviy kuchlarimiz qudratini yuz barobar oshirishga intilmoqda”, - deyiladi 3-iyul, juma kuni KXDRning markaziy “Nodon sinmun” gazetasida e’lon qilingan maqolada.
Nashr fikricha, Janubiy Koreyaga THAAD majmualarining joylashtirilishi Koreyaga qo‘shni davlatlar va AQSh o‘rtasidagi harbiy tahdid darajasini oshirib yuboradi, ular orasida to‘qnashuvlar yuz beradigan bo‘lsa, amerikaliklarning Osiyo-Tinch okeani havzasidagi “yadroviy qo‘rg‘oni” sifatida Koreya yarimorolining janubiy qismi AQSh dushmanlari tomonidan birinchi nishonga aylanadi.
“Nodon sinmun”ning qayd etishicha, Janubiy Koreyaga Amerikaning raketaga qarshi ko‘chma majmualarining joylashtirilishi mintaqadagi kuchlar muvozanatini buzadi.
Izoh (0)