Жиззах шаҳрида янги спорт мажмуаси фойдаланишга топширилди, деб хабар беради «ЎзА».
10 минг ўринли футбол стадиони, машғулотлар майдони, иккита мини- футбол майдончаси, енгил атлетика, сузиш ҳавзаси, гимнастика зали ва конференциялар залини ўз ичига олган спорт мажмуасида барча замонавий шароит яратилган.
Ўзбекистон Президенти Ислом Каримов 2013 йили вилоятга ташрифи чоғида Жиззах шаҳрининг бош режасига ўзгартириш киритиш тўғрисида қатор таклифлар билдириб, бу ишни амалга ошириш юзасидан маслаҳатлар берган эди.
Шаҳар марказидаги собиқ «Сўғдиёна» стадиони ўрнида йирик спорт мажмуаси ва истироҳат боғи барпо этилгани ҳам ана шу бунёдкорлик тизимидаги йирик объектлардан бири бўлди. Футболчиларнинг машғулот ўтказиши у ёқда турсин, ювиниши учун шароитлар жуда ночор аҳволда бўлган эски стадион ўрнида барча халқаро талабларга жавоб берадиган муҳташам спорт кошонаси қад ростлади.
Спорт мажмуаси таркибидаги 40х20 метрли иккита мини-футбол майдончасида футболчилар ҳамда футбол мактаби ўқувчиларининг машғулот ва турли мусобақалар ўтказиши учун барча шароит мавжуд.
Мажмуа ёнидаги ташландиқ ҳолга келиб қолган майдон ўрнида истироҳат боғи барпо этилиб, шаҳарнинг энг обод ва кўркам масканига айлантирилди. Бу ердаги фавворалар, болалар майдончалари, аттраксионлар, савдо ва хизмат кўрсатиш шохобчалари аҳоли хизматида.
Стадионнинг очилиш ўйинида «Сўғдиёна» клуби Олий лига доирасида «Қўқон-1912» жамоасини қабул қилди ва 2:1 ҳисобида ғалаба қозонди.
Изоҳ (0)