Ўзбекистон пиллакорлари 26 минг тоннадан зиёд пилла тайёрлаб, йиллик шартнома мажбуриятини адо этди, деб хабар беради «ЎзА».
Ўзбекистон Қишлоқ ва сув хўжалиги вазирлигидан маълум қилишларича, бу йил ўзбекистонлик пиллакорлар «Ипакчи-1», «Ипакчи-2», «Ўзбекистон-5», «Ўзбекистон-6» каби серҳосил, иқлим шароитимизга мос, касалликларга чидамли маҳаллий навлардан иборат 454 минг 600 қутидан зиёд ипак қурти уруғи парваришлаб, ҳар қутидан ўртача 57,6 килограммдан ҳосил олди.
Самарқанд, Қашқадарё, Сурхондарё, Бухоро, Фарғона, Наманган, Навоий вилоятлари пиллакорлари биринчилар қаторида пилла етиштириш бўйича шартномавий режани ошириб бажарди. Каттақўрғон, Касби, Жарқўрғон, Қоракўл, Бешариқ, Норин, Хатирчи туманларида ҳар қути ипак қуртидан 60—67 килограммдан ҳосил олишга эришилди.
Жорий йилда «Ўзпахтасаноат» уюшмаси тизимидаги пахта қабул қилиш пунктлари қошида ташкил этилган 196 ихтисослашган пиллахонада ҳам 22 минг 700 қути ипак қурти боқилди.
Пилла қабул қилиш пунктларида иш қизғин бормоқда. Кейинги йил пилла ҳосилига тайёргарлик кўриш, мавжуд тутзорларга ишлов бериш, уларни зараркунандалардан асраш ишлари ҳам давом этмоқда.
Изоҳ (0)