Ўзбекистон Кубоги 1/8 финали жавоб ўйинидан ўрин олган «Пахтакор» – «Шўртан» жамоалари ўртасидаги учрашувдан кейинги матбуот анжуманида мезбонлар бош мураббийи Самвел Бабаян учрашув ҳақидаги ва Ўзбекистон миллий терма жамоасига бош мураббий этиб тайинланиши тўғрисида фикрлари билан ўртоқлашди, деб хабар беради «Пахтакор» клуби матбуот хизмати.
Самвел Бабаян: - Ғалаба ва кейинги босқичга чиқиш учун зарур бўлган ишни амалга оширдик. Камроқ ўйин амалиётига эга бўлган йигитларга имконият бердик. Футболчилар барибир кучни тежаб ҳаракат қилди. Шу сабабли иккинчи бўлимда баъзи хатолар юзага келди. Буларни алоҳида кўриб чиқамиз. Лобанов танаффусдан кейин бир қатор ҳолатларда ўзини кўрсатди.
Терма жамоага бош мураббий этиб тайинланишим мен учун кутилмаган ҳол бўлди. Бу мен учун катта фахр. «Пахтакор»да ким ишлашидан қатъи назар тизим давом этиши керак. Мен шуни мақсад қилгандим. «Пахтакор» ўзбек футболининг байроқдори бўлиб қолаверади.
Эслатиб ўтамиз, Самвел Бабаен 23 июнь куни Ўзбекистон миллий терма жамоаси бош мураббийи этиб тайинланганди.
Изоҳ (0)