«Бунёдкор» клуби ва Ўзбекистон миллий термаси ярим ҳимоячиси Сардор Рашидов Қатарнинг «Ал Жайиш» клубига ўтиши мумкинлиги ҳақида хабар бергандик. Футболчи «Футбол экспресс» газетасига берган интервюсида бу гапларни тасдиқлади, деб хабар беради «Championat.asia».
- Сиз билан илгари гаплашганимизда мақсадингиз Европа чемпионатида тўп суриш эканлигини айтгандингиз ва бу борада кўп гапиргансиз. Лекин сиз Осиёнинг бошқа жамоасига ўтяпсиз. Бунга муносабатингиз қандай? Тўғри қарор қабул қиляпсизми?- Ҳа, Европада ўйнаш ниятим борлигини айтганман. У ердан ҳам бир қатор жамоалар қизиқиш билдирди. Айтишим керакки, Қатардан жуда яхши таклиф келиб тушди. Биласиз-ку, 2022 йили бу мамлакатда жаҳон чемпионати ўтказилади. Шунинг учун ҳозирданоқ жуда жиддий равишда тайёргарлик кўришмоқда. Бунинг учун миллий чемпионатини янада кучайтириш учун янги лойиҳаларни ишлаб чиқишяпти. Яқинда «Барселона»дан Хавини таклиф қилишди ва у «Ал Садд» билан шартнома имзолади. Бундан ташқари, яна бошқа юлдуз ўйинчилар Қатар чемпионатига ошиқяпти. Менга таклиф билан чиққан «Ал Жайиш» клуби ҳам катта салоҳиятга эга. Бу жамоа мен учун нотаниш эмас. Илгари чемпионлар лигаси баҳсларида «Ал Жайиш»га қарши ўйнаганмиз. Қатар футболи охирги йилларда кескин даражада ўсиб боряпти. Ушбу чемпионатда тўп суриш орқали кейинчалик Европага йўл олишим мумкин.
- Маълумки, сизга арабларнинг яна кўплаб гранд жамоаларидан таклифлар бўлганди. Масалан, Саудия Арабистонидан «Ал Наср» ва «Ал Ҳилол» жиддий қизиққанди...- Тўғри, Саудиядан «Ал Наср» билан «Ал Ҳилол» алоқага чиқди. Менимча, улардан кўра Қатар чемпионатини кучлироқ деб ҳисоблайман. Шунингдек, бу ерда кўзга ташланган кўплаб хорижлик футболчилар тўп суради. Саудияда эса камроқ. Қатарга яна бир қатор номдор ўйинчилар келишда давом этади. Шунинг учун ҳам Қатарни танладим. Лекин ҳали «Ал Жайиш»га ўтганим 100 фоизга расмийлашгани йўқ. Яқин орада ҳаммаси ҳал бўлади.
Изоҳ (0)