АҚШнинг Жанубий Каролина штати Чарлстон шаҳридаги черковда юз берган фожиа замонавий Америка жамоатчилиги учун расизм — касаллик бўлиб қолаётганини кўрсатмоқда. Бу ҳақда АҚШ президенти Барак Обама Сан-Францискода кечган шаҳар мерлари анжуманидаги чиқишида айтиб ўтди, деб хабар беради ТАСС.
«Черковга қилинган ҳужум расизм биз курашишимиз керак бўлган касаллик бўлиб қолаётганини кўрсатиб берди. Шуни тан олиш керакки, бу каби жиноятлар одатий ҳолга айланди», — деди президент.
Обама 2013 йилда АҚШда ўқотар қуроллар билан қилинган ҳужумлар оқибатида 11 мингдан ортиқ одам ҳалок бўлганини эслатиб ўтди. «Бошқа ҳеч қайси ривожланган мамлакатда бундай ҳолат йўқ», — деб қўшимча қилди Обама.
Чарлстон черковидаги фожиа 17 июнь, чоршанба куни содир бўлди. Асосан афро-америкаликлар қатнайдиган черков ташрифчиларига 21 ёшдаги оқ танли йигит ўқ узган. Натижада олти нафар аёл ва уч эркак ҳалок бўлди. Улар орасида черков руҳонийси ва Жанубий Каролина штати қонунчилик кенгаши сенатори Клемент Пинкни ҳам бор эди.
Кейинроқ ҳуқуқ-тартибот органлари жиноят содир этишда гумон қилинаётган Дилан Руфни қўлга олди.
Изоҳ (0)