20 май куни Ўзбекистон Хотин-қизлар қўмитаси ташаббуси билан бир қатор давлат ва жамоат ташкилотлари ҳамкорлигида «Маънавиятимизни асраб қолайлик!» маърифий тадбири ўтказилди, деб хабар бермоқда «Оила даврасида» газетаси. Тадбирда сенаторлар, депутатлар, маданият ва санъат мутасаддилари, Тошкент шаҳридаги тўйхона ва ресторанлар раҳбарлари, хонандалар ва журналистлар иштирок этди.
«Баъзан экранларимиздаги клиплар, қўшиқчи-ю раққосаларимиз ёки актрисаларимизнинг бачкана қилиқларини кўриб, мантиқсиз сўзларини тинглаб, «маънавиятимизни, ёшларимиз тарбиясини соат сайин бой бериб қўймаяпмизми?», деган савол хаёлингдан ўтади. Бу борада айрим хонандаларимизнинг турли ажнабий ва миллийликка ёт либосларни кийишлари, ёшларнинг тарбиясига салбий таъсир кўрсатадиган саёз қўшиқ матнлари, қўпол, беҳаё ва беандиша ҳаракатлар акс эттирилган клипларнинг оила даврасида кўриладиган экранларга узатилаётганини нима билан изоҳлаш мумкин?!», — деди Ўзбекистон Бош вазирининг ўринбосари, Хотин-қизлар қўмитаси раиси Элмира Боситхонова.
Миллий эстрада санъатини ривожлантириш ва мувофиқлаштириш кенгаши раиси Иқбол Мирзо тадбирда эстрада санъати маҳсулотларининг маънавий савиясини қонун йўли билан тартибга солиш пайти келганини таъкидлади.
Тадбирда айтилишича, фақат Тошкент шаҳрида 140 дан зиёд тўйхона ва ресторанлар фаолият юритмоқда. Ўрнатилган тартибга қарамай айрим тўйлар дабдаба ва мол-дунёни кўз-кўз қилиш, ҳаёсиз рақслар майдонига айланиб қолмоқда.
«Ўзбекистон — Робинзон яшайдиган орол эмас, агар кимки, бугун демократия, истаганимни қиламан, деб ўйласа, халқ, жамият фикри билан ҳисоблашмаса, қаттиқ адашади», — деб ёзади «Оила даврасида» газетаси.
Изоҳ (0)