Наманган шаҳрида теннис бўйича соврин жамғармаси 25 минг доллардан иборат турнирнинг асосий тўр баҳслари старт олди, деб хабар беради «Olamsport.com».
Мусобақада ЖАР, Россия, Туркия, Қозоғистон, Украина, Ҳиндистон, Словакия, Чехия, Германия, Польша каби давлатлардан келган теннисчилар иштирок этяпти.
Улар орасида асосий тўрда саккиз нафар ўзбекистонлик теннисчи ўз имкониятини синовдан ўтказади. 8 июнь куни ўтказилган учрашувлардан сўнг улардан уч нафари иккинчи даврага йўлланма олди. Турнирда иккинчи рақам остида таснифланган Нигина Абдураимова илк босқичда яна бир ўзбекистонлик Полина Меренковани 6:4, 6:1 ҳисобида таслим этди.
Мусобақанинг учинчи ракеткаси ҳисобланган Оқгул Омонмуродова қозоғистонлик Екатерина Клюевадан 6:3, 6:1 ҳисобида устун келди. Тўртинчи рақам остида ҳаракат қилаётган Сабина Шарипова эса испаниялик Нурия Парризас-Диасни баҳслардан чиқариб юборди. Биринчи сет 6:4 ҳисобида Сабина фойдасига ҳал бўлди. Иккинчи сетда 0:4 ҳисобида мағлуб бўлаётган испан теннисчиси баҳсни давом эттира олмаслигини маълум қилди.
Альбина Хабибулина польшалик Жюстина Жагиолкага 2:6, 1:6, Влада Якшибарова эса ҳиндистонлик Анкита Райнага 4:6, 5:7 ҳисобида имкониятни бой бериб қўйди. 9 июнь куни ўзбекистонликлардан Арина Фольц ва Гулчеҳра Муҳаммадсиддиқова ўз учрашувларини ўтказади.
Изоҳ (0)