Deutsche Bank’нинг бош қароргоҳида тинтув ўтказилди

Полиция Deutsche Bank’нинг Франкфуртдаги бош қароргоҳида тинтув ўтказди. Бу ҳақда Meduza.io хабар бермоқда.

Германия Бош прокуратурасидан маълум қилишларича, тинтув «олиб борилаётган тергов доирасида» ўтказилган, бошқа тафсилотлар маълум қилинмаган.

Ўз навбатида, Deutsche Bank тинтув ўтказилганини тасдиқлаб, мазкур ҳаракатлар учун рухсатнома Висбаден прокуратураси томонидан берилганини қўшимча қилди.

Deutsche Bank томонидан тарқатилган баёнотда қайд этилишича, «тинтув мижозлар томонидан амалга оширилган қимматли қоғозлар билан боғлиқ маълум операцияларни ўрганиш иши билан боғлиқ далилларни излашга қаратилган».

Германия Бош прокуратураси терговнинг «тезкор босқичи» ҳали якунига етмаганини билдириб, тинтув сабабларини маълум қилишдан бош тортди.

Сўнгги вақтларда Deutsche Bank бир қатор можароларга аралашиб қолди. Хусусан, банк пул ювишга кўмаклашиш, солиқлардан бўйин товлаш, базавий фоиз ставкаларини манипуляция қилишда гумон қилинмоқда. Ушбу можаролар ортидан 7 июнь куни банк бош дирекрторлари Аншу Жейн ва Юрген Фитшен истеъфо берди.