Марказий разведка бошқармаси (МРБ) раҳбари Жон Бреннан махфий равиша Исроилга ташриф буюрди. «РИА Новости» хабарига кўра, у Исроил бош вазири Беньямин Нетаньяҳу, шунингдек, Исроилнинг турли разведка хизматлари, хусусан, «Моссад»нинг юқори мартабали вакиллари билан учрашган.
Кўпдан бери кутилган ташриф давомида МРБ раҳбари «Моссад» ташқи разведка хизмати раҳбари Тамир Пардо, ҳарбий разведка қўмондони, генерал майор Херци Алеви ва миллий хавфсизлик масалалари бўйича маслаҳатчи Йоси Коэн билан учрашди, дея хабар бермоқда Исроилнинг Haaretz нашри.
Хабар беришларича, МРБ раҳбари Исроил томони вакиллари билан бўлиб ўтган учрашувлар чоғида асосан Эрон ядровий дастури бўйича 30 июнь куни имзоланиши кутилаётган шартнома борасида фикр алмашилган.
Манбаларнинг сўзларига кўра, мулоқотлар чоғида Яқин Шарқ мамлакатларидаги террорчиларнинг фаоллиги ва қўпорувчилик ҳаракатларидаги Эроннинг эҳтимолий иштироки ҳам муҳокама қилинган.
МРБ расмийлари мазкур ташриф ҳақидаги ахборотларга изоҳ беришдан бош тортишди.
Изоҳ (0)