Порошенко 1,5 млрд долларлик кредит кафолатлари учун Японияга миннатдорлик билдирди

Япония Украинага молиявий барқарорликни таъминлаш учун 1,5 миллиард доллар кредит ажратади. Бу ҳақда 6 июнь куни Украина президенти Пётр Порошенко Япония бош вазири Синдзо Абэ билан учрашув якунлари бўйича айтиб ўтди, деб ёзади «РБК».

«Мен Япониядан 1,5 миллиард доллар ҳажмидаги кредит кафолатлари тақдим этгани учун миннатдорман, у бизга Украина молиявий тизими барқарорлигини таъминлаш имконини беради. Бундай ёндашув Украина учун қийин даврда чинакам бирдамлик ва амалий ёрдам кўрсатиш ҳисобланади», — деди Порошенко.

Украина ва Япония шунингдек, Киев яқинидаги Бортник аэрация станциясини реконструкция қилиш учун 1,1 миллиард долларлик кредит ҳақида шартнома имзолади.

Эслатиб ўтамиз, Япония бош вазири Синдзо Абэ 5—6 июнь кунлари Украинада тарихдаги илк расмий ташриф билан бўлди.