Қуёш батареяларида ҳаракатланувчи Solar Impulse 2 самолёти Хитойдан Гавайига учди

30 май куни Хитойнинг Нанкин шаҳрида Швейцариянинг қуёш батареяларида ишловчи Solar Impulse 2 самолёти старт олди, дея хабар бермоқда Look At Me.

Режа бўйича самолёт фақат қуёш энергиясидан қувват олган ҳолда 8172 км масофани босиб ўтади. Парвоз 120 соат вақт олиши керак. Сўнгги манзил — Гавайи оролларидаги Калаэола. Шундан сўнг Solar Impulse 2 Фениксга 4694 километрлик саёҳатни амалга оширади. Жами 12 та парвоз амалга оширилади, улар ёнилғисиз учадиган самолётда қилинган биринчи дунё бўйлаб саёҳатни ташкил этади. У июлда Абу-Дабида ниҳоясига етади.

Solar Impulse 2 ўтган йилнинг апрелида тақдим этилган, июнида эса синовлардан муваффақиятли ўтган эди. Унинг қанотлари қулочи 72 метр, оғирлиги 2,3 тоннага тенг. Самолёт қаноти 17,2 мингта қуёш батареялари билан қопланган. Самолётнинг максимал тезлиги соатига 140 километрни ташкил этади.