Россия бош вазири Дмитрий Медведев Грузия собиқ президенти Михаил Саакашвилининг Украинанинг Одесса вилоятига губернатори этиб тайинланганига ўз муносабатини билдирди. Бу ҳақда RBC.ru хабар бермоқда.
«Саакашвили – Одесса вилояти раҳбари. Шапито-шоу давом этади. Бахтсиз Украина...», - деб ёзди Медведев Twitter’даги аккаунтида.
Аввалроқ Саакашвилининг Украинадаги вилоятга раҳбар этиб тайинланганини Россия Ташқи ишлар вазирлигининг инсон ҳуқуқлари бўйича вакили Константин Долгов танқид қилиб чиққанди.
Порошенко шанба куни Саакашвилини Одесса вилоятининг янги раҳбари этиб тайинлаш ҳақидаги фармонни имзолаб, шу куннинг ўзида уни вилоят жамоатчилиги ва аҳолисига таништирди.
Таништириш маросимида Саакашвили Одессани «энг катта фойдаланилмаган имкониятлар шаҳри» деб атаб, уни «бутунжаҳон мўъжизаси»га ҳамда сайёҳлар ва инвесторларни жалб қилиш йўли билан Қораденгизбўйи пойтахтига айлантиришга ваъда берди.
Аввалроқ Саакашвили жамоатчилик асосида Украинада ислоҳотларни ўтказиш бўйича халқаро маслаҳат кенгашига раҳбарлик қилаётганди. Унга мамлакат ҳукуматидан ҳам лавозим таклиф қилишганди, бироқ у бу таклифни рад этганди.
Грузияда эса Саакашвили давлат маблағларини талон-тарож қилишда айбланиб, қидирувга берилган.
Изоҳ (0)