27 май куни беш кунлик ишчи ташрифи билан Халқаро регби иттифоқи президенти Бернард Лапассет Тошкентга келади. Бу ҳақда Ўзбекистон регби федерациясига таяниб, «Газета.uz» хабар қилмоқда.
Бернард Лапассет ташриф давомида Get Into Rugby халқаро дастурининг Ўзбекистонда амалга оширилиш жараёни билан танишади, регбичиларнинг тайёргарлик базасини кўздан кечиради ҳамда давлат, спорт ва ишчи доиралари вакиллари билан учрашувлар ўтказади.
У яна Осиё чемпионати доирасидаги Ўзбекистон ва Ҳиндистон эркаклар терма жамоалари ўйинига ташриф буюради ҳамда Осиё регби федерацияси ижроқўмининг йиғилишида иштирок этади.
«Бернард Лапассетни Ўзбекистонда қабул қилиш биз учун катта шараф, — деди Ўзбекистон регби федерацияси раҳбари Содиқ Сафоев. — Бу ташриф Ўзбекистон ҳамда Марказий Осиё минтақасида регбининг ривожланишига янги туртки беришига ишонаман».
Бернард Лапассетнинг Марказий Осиёга биринчи ташрифи 1 июнга қадар давом этади. Айни вақтда минтақадаги давлатлардан фақат Қозоғистон ва Ўзбекистон Халқаро регби иттифоқининг тўлақонли аъзоси ҳисобланади. Ўзбекистон 2014 йилнинг 14 май куни Бутунжаҳон регби ташкилотининг тўлақонли аъзосига айланган.
Изоҳ (0)