25 май куни тонгдан Нилуфар Усмонова ўз ижодий жамоаси билан пойтахт мактабларига йўл олди. Айнан шу куни мактаб битирувчиларини табриклаб, ўзининг болалигига бир он қайтишни ният қилган хонанда, кутилмаган ва байрам авжига чиққан бир маҳалда, мактабларга ташриф буюриб, барча битирувчиларни табриклаб уларни хушнуд этди, деб хабар қилади «Popcorn.uz».
«Мактаб даври, сўнгги қўнғироқ ҳар биримизнинг энг соғинчли онларимиз десак адашмаймиз. Чунки ҳар бир инсон қалбини сўнгги қўнғироқ куни ажиб бир ҳис қамраб олади. Битирувчиларни кўриб беихтиёр кўзга ёш келади. Коллеж, лицей ёки институтни битирганда бунчалик ҳис бўлмайди назаримда. Мана, бугун битирувчиларнинг қувончига шерик бўлиш, уларни хурсанд қилиш мақсадида хоҳлаган мактабимизга тўсатдан кириб, уларни табриклаб чиқяпмиз. Бунда биз янги «Хайр, мактабим» деб номланган янги қўшиғимизни куйлаб, кутилмаган ҳаяжонли онларга бой кунни тасвирга олишга ҳам аҳд қилдик»,— деди Нилуфар Усмонова.
Албатта, кутилмаган сюрприздан битирувчиларнинг бошлари кўкка етди, сабаби ҳеч кимнинг хаёлига келмаган бу иш бир умр эсда қоларли бўлди. Хонанда Тошкент шаҳридаги бир нечта мактабларга жумладан, 145-мактаб, 96-мактаб, «Успенский» номидаги мусиқа мактаби ва 110-мактабга ташриф буюрди.
Юқорида хонанда айтиб ўтганидек, ҳар бир қувончли дақиқа тасвирга олинди. Ўқувчиларни хурсанд қилиш билан бирга мазкур қўшиққа ўз-ўзидан видеоклип ҳам суратга олинди. Ҳеч қандай тайёргарликсиз, бирорта ҳам кадрни такрорламасдан тўғридан-тўғри «Nonstop» тарзида тасвирга олинган видеоклипга Жонрид Сагдиев режиссёрлик қилди. Қўшиқнинг ғояси Нилуфар Усмоновага, матни ва мусиқаси Якзонга, аранжировка эса ёш умидли ижодкор Камронга тегишли.
Изоҳ (0)